1.
A na hori oves pokošenyj,
prekrasňi vin do kopy skladenyj
[:a na verjchu sydyť lasťivočka,
ľubuje ňja prekrasna ďivočka.:]

2.
Keď ja išov cez zelenu lučku,
viďiv jem tam svoju frajiročku.
[:Vytaj, vytaj, frajiročko moja,
bo ja idu, što novoho doma?:]

3.
Ona stala, ručku mi podala,
prežalosňi sobi zaplakala.
[:A čom plačeš, frajiročko moja,
čom jes taka smutna nevesela?:]

4.
A jak by ja smutna ne plakala,
keď mi tvoja maťir povidala,
[:že jak pryjdeš z vojny do civiľu,
mňa chudobnu ne vozmeš za ženu.:]

5.
Ne plač mila, bo to nyč nepravda,
bo to bude lem dajaka ľabda,
[:stary baby roboty ne majuť,
lem ša o nas molodych starajuť.:]

6.
Mila moja, ne sluchaj nykoho,
lem ša trymaj rozuma svojoho,
[:choc bys mala lem jedno kabaťa,
dušo moja, ne zochabľju ja ťa.:]