1.
Na Vackovej hori, na Vackovej hori, konič pokošena,
kody že ja budu, kody že ja budu, Jaňičkova žena,
[:či už toho ročku, abo až na druhyj, jak mi z vojny pride,
jak mi z vojny pride, Jaňičok mij ľubyj.:]

2.
Mohla by jem ity, mohla by jem ity, konič pohrabaty,
a do kupinočok, a do kupinočok, šumňi poskladaty,
[:by Jankova mamka, na mene kukala, jaku nevistočku,
jaku nevistočku, ona bude mala.:]

3.
Šumna ja divočka, šumna ja divočka, nemam v seľi paru,
chlopci za mnom choďat, chlopci za mnom choďat, z druhoho chotaru,
[:aľe ja jich nechcu, vera nychtoroho, bo ja ľem ľubuju,
bo ja ľem ľubuju, frajira svojoho.:]

4.
Prid ku mi Janičku, prid ku mi Jaňičku, do sadu zvečera,
povim ty novinu, povim ty novinu, što jem čula včera
[:že ňa tvoja mamka, za nevistu nechce, pre toto mij ľubyj,
pre toto mij ľubyj, plače moje serdce.:]

5.
Nebudu plakala, nebudu plakala, žaľu vyvodila,
naj plače tot šuhaj, naj plače tot šuhaj, što ja ho ľubila,
[:naj by mu začaľi jarkom sylzy teči, zato že vyn sluchal,
zato že vyn sluchal, toty babsky reči.:]